آذربايجان ميللتچي لرينه خطابه لر ( 3 ) : تبريز – تهران قاتاري
يولا دوشور ، فرمان بيزيم اليميزده اولماليدير
ائلوار قلي وند / صادق رضايي
بيز بير سؤز وار اونا اينانيريق و بو جومله نين اساسيندا دانيشيريق : آذربايجانين منافعي تهراندان كئچير . تبريز قاتاريني دايانديرانلار واردير . بيز بو قاتاري حركته گتيرمه ليييك . بو قاتارا ميننلر مقصده چاتاجاقلار . مينمه ينلرسه دمير يولوندا دايانماسينلار .
كئچن كامنتلرين ايچينده بعضي گؤزه ده ين سورغولار واردير . بو سورغولارين بعضي نه مجبورن يئنه جواب وئرمه ليييك و بعضن مجبور اولوروق ساده و كيلاسيك تعريف لري دوستلار اوچون آچيقلاميش اولاق . بيز دوستلارين عصبي داورانيشلاريني قيراغا قوياراق اونلارين ناخوداگاهلارينداكي همن يئتيشمه ميش و رنگ آلماميش سورغولاريني آختاريريق و اونلارا يانيت وئرمك ايسته ييريك . دوستلارين اساسي سورغولاريندان بيريسي تهران حركاتيني ليبراليستي آنلاييش و بيزي بو ليبراليزمين حيمايه كارلاري آدلانديرماقدير . بيرينجي ده بونو آچيقلاماليييق كي سياسي بير حركت ليبراليستي اولا بيلمزدير . چون ليبراليزم بير طبقه حساب اولونمور . ليبراليزم بير سيستمدير ، اؤزوده بوروكراتيك ( ديوان سالاري ) بير داورانيش و موناسيبتلرين ايچينده تعريفله نن بير سيستم . سياسي اولاي لار طبقه نين ايچينده و ايستك لرينده معنالانير . تهران حركاتي خورده بورژوازينين اينقيلابي گوجو حسابلانا بيلير آما ليبراليستي باخيشدا معناسيني الدن وئرير . بوردان بئله تهران حركاتي باره ده دانيشاندا بيز خورده بورژوازي سؤزجويونو ايشلتمه ييميز گركدير . ايراندا هله ده فئوداليزمين موناسيبتلري ديريدير و خورده بورژوازي اينقيلابي بير گوج حسابلانير و تاريخي نقشيني تاماملاماييبدير . بوندان آسيلي اولاراق هله ده ايراندا ايشچي ( كارگر ) طبقه سي خورد بورژوازي ايله بيرليكده بعضي موشترك منافع لري واردير . بو موشترك منافع بو ايكي طبقه ني سياسي حركتلرده بيري بيريني دستك له مه يه مجبور ائدير . لنين دئييركي طبقاتي موباريزه لرده ايشچي طبقه سي دئموكراتيك گوجلري اؤزونه جذب ائتمه لي و ايستكلري اوغروندا اونلاردان تاكتيكي فايدالانماليدير . ائله كي ماركس فرانسانين اينقيلابيندا همن خورده بورژوازينين جانفوشاليقيني دستك له ميش و اونو مدح ائتميشدير . مشروطه اينقيلابيندان همن بو ايللره قدر خورده بورژوازي اينقيلابي بير گوج اولاراق تاريخي نقشينه داوام ائدير . حتتا بيزيم فيكريميزجه ميللتچي لرين ايچينده ده بعضن بو دئموكرات گوجلر واردير و آزادليق اوغروندا موباريزه ني ايره لي آپارادا بيليرلر . آما اونلار موستقيل عمل ائتمه يه قادير دئييلديلر و سياسي حركتلري تك باشينا ايره لي آپارا بيلمزلر . چون طبقاتي بير اينامدا ووروشمورلار و تكجه بير حربي نيرويا چئوريله بيليرلر . ميللتچي لرين دئموكرات نيرولاري سولچولارين كؤمه يي ايله دوز و تميز يول تاپمايا قادير اولاجاقديلار . بيز آذربايجانين منافع لريني دوز تشخيص وئريريك . اونلار بيزيم قاتارا مينمه ليديلر و تبريزي تهران نجات وئره جكدير .
بو سؤزلرين آرديجا دوستلارين داييم سوردوقلاري بير جومله آرايا گلير : تهران كيميندير ؟ تهران ايران چرچووه سينده ياشايان ميللتلر آراسي موشترك المنافع بير ايالتدير . تهران هامينيندير . نه پان ايرانيست لر و نه پان توركيست لر بو شهري موعاميلات بنگاهلاريندا اؤز آدلارينا كئچمه يه ايختيارلاري يوخدو .
بو سؤزون آرديجا بو سورغونو سوراجاقسينيز : ندن فارسلار بيزيم مدني حقلريميزي ( ديل ) وئرميرلر ؟ و ندن فارس ضياليلاري بيزيم ايستكلريميزي دستكله ميرلر ؟ بونودا بئله آيدينلاشديراق : بيرينجيده بونو دئمه ليييك كي فارسلارين تاريخي تجروبه لرينده ديللرينين حوقوقو باره ده هئچ بير ظولم تجروبه لري يوخدور . اونلار آذربايجانلي لارين بو ايسته ييني تام دوشونه بيلميرلر . بونوندا باعيثي سيز ميللتچي لرين آنلاشيلمازجا قونوشمالاريدير . سيز بو باره ده دوز بير ديالوگا داخيل اولا بيلميرسينيز و حساس سياسي حاديثه لرده دوزگون داورانماييرسينيز . تهران ايتتيفاقاتيندا كوردلرين بوتون سياسي قوروپلاري اونلاري دستك له ميش و سياسي بيانيه لر وئرميشلر . و تهران باشچيلاريدا اونلاري رسمن دستكله ميش و حيمايت ائتميشديلر . بو سياسي موقاويله لر تاريخي و گله جه يي آماج توتان بير ايتتيفاقلاردير . اونلار اينديدن اؤز منافع لريني قورويوب ساخلاييرلار . اؤزلرينه اعتيبار قازانيرلار و اؤزلرينه رسميت باغيشلاييرلار ... سيز ميللتچي لرسه تهراندا كئچه ن دئموكراتيك آكسيالارا قاتيلميرسيز و سونرادان دئموكراتيك ايستك لرينيزي مركزي حوكومتدن طلب ائديرسينيز . بير ديققت ائدينيز كي سياسي عمللريز ايله سياسي ايستكلرينيزين نقدر تناقوضلاري واردير . بوندان سوايي لازيم دئييلدير بير ميللت باشقا ميللتين ديلي باره ده حيمايتيني گؤسترسين . نئجه كي آذربايجانلي لارا لازيم دئييلدير خليج فارس آدي موناقيشه سينه داخيل اولسون اونلاردا 85 ايتتيفاقلارينا هئچ بير حساسيت گؤسترمه ديلر و اساسنده لازيم دئييل . بوندان سوايي هئچ بير فارس ضيالي 85 ايتتيفاقلارينين عليهينه آغير بير قونوشما ياپمادير و بعضن فارس ضيالي لاري 85 ايتتيفاقلاريني دستكله ميش و آذربايجانلي لارين مدني حوقوقلاري اساسيندا حيمايت بيانيه لري وئرميشدير ( لازيم گليرسه عئيني فاكتلاريميز واردير ) . ميللتچي لر بوتون سياسي حوقوقلاريني ايدمان ايستاديوملاريندا گزيرلر و بيلميرلر كي سياسي ايستك خياباندا اؤزونه معنا باغيشلايير . سياسي اكت ايستاديومدا يوخ بلكه بولواردادير . ميللتچي لر ندن فلسفي - سياسي ادبياتيندا قونوشماغي باشارميرلار ؟ بونا جواب وئره جه ييك . گلينيز دايانيب دانيشمايايين ، قاتار گئدير ... تاكي تاكا تاكي تاكا تاكي تا .....
